చిన్నప్పుడన్నీ ఆశ్చర్యమే!
చూరు నుండి కారే వర్షపు చుక్కలు
రేవులో దిగిన ఆవుల మందలు
గూట్లో కువకువలాడే పావురాయి
ఎగిరే గాలిపటం కదిలే నీరు
దూదిపింజెల్లా తేలే మబ్బులు
వెన్నెట్లో పరిగెత్తే చందమామ
పాలు తాగే కుక్కపిల్ల
కళ్ళింత చేసుకొని చూస్తుంటారు పిల్లలు
ఎప్పుడూ కొత్తగా చెప్తుంటారు కవులు
వాళ్ళు భాషను పుట్టిస్తారు
వాళ్ళు భాషను పండిస్తారు
బ్రతుకుకీ మృత్యువుకీ మధ్య
దారి కడతారు
అమ్మ వొడిలో హాయిగా కన్ను మూస్తారు
అమ్మ చచ్చిపోతే రొమ్ము కుడుస్తూ ఆడుకొంటారు