"ఖడ్ జావ్... ఆగే బడేతో గోలీ మార్ దూంగా..." అని హెచ్చరించాడు ఇంకొక ఇన్స్‌పెక్టర్. ధనా ధన్ మని దిక్కులు దద్దరిల్లేలా రివాల్వర్స్‌ని ప్రయోగించారు మరో ఇద్దరు.

ఆగలేదు షాడో. ఆగితే తన పని అంతటితో ఆఖరే అని అతనికి కొట్టవచ్చినట్లు అర్థం అవుతోంది. సారా అమ్మిన వాళ్ళ చేతుల్ని నరికిస్తోంది పాకిస్తాన్ ప్రభుత్వం. సారాను సప్లయి చేసే వాళ్ళ గొంతుల్ని పిసికించకుండా వూరుకుంటుందా?

ముళ్ళపొదలకు పట్టుకుని మరింతగా చినిగి పీలికలై పోయాయి అతను ధరించి వున్న సెకండ్ హాండ్ దుస్తులు. అయినా సరే లెక్కచేయకుండా అలాగే ముందుకు పోయాడు. అతన్ని అంతటితో వదిలి పెట్టదలుచుకోలేదు ఇన్‌స్పెక్టర్లు. వేటకుక్కల్లా వెంటపడి తరమటం ప్రారంభించారు.

రెండు గంటల పాటు ఏకబిగిన పరిగెత్తాడు షాడో. ఆయాసంతో ఎగిరెగిరి పడుతున్నది అతని ఛాతీ... విపరీతమైన బడలికతో తడబడటం మొదలు పెట్టాయి అతని పాదాలు.