ఆగ్రహం రాని అక్షరం జ్వలించదనీ

ఆర్ద్రత లేని వాక్యం ఫలించదనీ

నా అనుభవం నేర్పిన కవిత్వపాఠం

నాలుగు మెతుకులే నా అక్షరాలు

నాలుగు మనుషులే నేను చదివిన ప్రబంధాలు

నా బాల దృశ్యాలే

నేను చూసిన అలంకార శాస్త్రాలు

ఆకలి రసం నాలోని రచనా రహస్యం

అవమాన విషం

నా కంఠంలోని నీలామృత విశేషం

మా బీద బస్తీలే నన్ను కవిని చేశాయి

నాలోని భావుకత్వానికీ.

బాధల తత్త్వానికి బాటలు వేసాయి

మా వీధి కుక్కులు

జీవితాన్నీ

జీవించడాన్ని నేర్పాయి

- ఎండ్లూరి సుధాకర్