నిస్సందేహంగా ఇది గొప్ప నవల. ఎందుకంటే ఎంతో కశ్మలం వున్న సమకాలిక సమాజంలోనుంచి ఒక వ్యక్తిని ఎంతగొప్పగా నడిపించుకుపోయారు: అతను ”అవినీతి” అనబడే పనులు చేసి ఉండవచ్చుగాక. కాని ఎలా నడుచుకుంటూ వెళ్ళి శిఖరాల నందుకున్నాడన్నది ముఖ్యాంశం. వ్యక్తిలో, సమాజంలో మంచీ- చెడూ రెండూ వుంటాయి. కాని మానవత్వానికి కావలసింది సార్థకత, వ్యక్తి తన చేష్టల ద్వారా కొన్ని విలువల్ని పరిపోషించడము. ఆ విలువలు ఈ నవలలో ప్రస్ఫుటంగా వున్నాయి.

నవల భాషను గూర్చి ఒక్కమాట చెప్పాలి. ఇది నూటికి నూరు పాళ్ళు తెలుగు నవల, తెలుగు పలుకుబడి సహస్ర ముఖాలుగా దర్శనమిచ్చే నవల. మరొక భాష ఏదీ ఈ నవల భాషను లేశమాత్రమైనా ప్రభావితం చేయకపోవడం ఒక విశేషం. అంతేకాక మొత్తం తెలుగు పలుకుబళ్ళన్నీ చోటుచేసుకున్న సాంఘిక నవల ఇది.

- డి.రామలింగం