అమెరికాలోని ప్రవాస భారతీయుల ప్రోత్సాహంతో అనేక సంస్థలు ఒకే వేదిక పైకి వచ్చి "వరల్డ్ విశ్వ శాంతి ఫెడరేషన్"గా ఏర్పడతాయి. వారి ముఖ్య ఉద్దేశం రామసేతువుపై వాదోపవాదాలు పెంచడం కాక సత్యాన్వేషణ చేసి నిజాన్ని నిగ్గు తేల్చటమే.

వారి ప్రయత్నాలలో భాగంగా ఒక కోర్ టీం భారతదేశానికి సత్యాన్వేషణకై వస్తుంది. అందులో ఇద్దరు ప్రవాసభారతీయులు, ఒక శ్రీలంక అర్కియాలజిస్టు, ఒక అమెరికన్ యువతి వస్తారు.

ఈ శాస్త్రవేత్తల బృందం రామసేతు నిజనిర్థారణ విషయంలో ఆవిష్కరించిన అద్భుత విషయాలు, వారు ఎదుర్కున్న జటిల సమస్యలను పరిష్కరించిన తీరు అత్యద్భుతం.

రామసేతువుని నలుని ఆధ్వర్యంలో ఐదు రోజులలో నిర్మించారు. వరుసగా 14,20,21,22,23 యోజనాల చొప్పున ఐదు రోజులలో నూరు యోజనాల పొడవు, పదియోజనాల వెడల్పు ఉన్న మహాసేతువు నిర్మించబడింది. రోజుకి 20 యోజనాల చొప్పున నిర్మించకుండా ఈ విధంగా వివిధ సంఖ్యలతో నిర్మించడానికి వెనుక ఉన్న దేవరహస్యం ఏమిటి? దానిని ఈ యువ బృందం ఎలా కనిపెడుతుంది?

సాగరునిపై ఎక్కుపెట్టిన బ్రహ్మాస్త్రాన్ని శ్రీ రాముడు ఎక్కడికి గురి పెట్టాడు. దాని పర్యవసానం ఏమిటి?

యుగయుగాలుగా ఏక పత్నీవ్రతానికి ప్రతీకగా నిల్చిన శ్రీరాముణ్ణి నేటి యువత ఏ రకంగా అభిమానిస్తారు? అసలైన ప్రేమ చిహ్నం ఎక్కడుంది?

ఆద్యంతం ఉత్కంఠ రేకెత్తిస్తూ నడిచిన కథాగమనం, అంతా చదివాక ఇదంతా నిజమేనా, నిజమైతే ఎంత బాగుణ్ణు అనిపించేలా ఉన్న రచనాశైలి, మిమ్మల్ని తప్పక ఆకట్టుకుంటాయి.

'సేతు రహస్యం' పేరుతో ఒక చారిత్రక వైజ్ఞానిక పరిశోధనాంశాలను నవలీకరించిన గొప్ప కృషి ఇది.

- సామవేదం షణ్ముఖశర్మ