వర్గ దోపిడికి వ్యతిరేకంగా, సమ సమాజ నిర్మాణానికి చిత్తశుద్ధితో, ఉద్యమ నిబద్ధతతో నక్సలైట్ల పురోగమనం ఈ నవలకు ఇతివృత్తం. నవల అనగానే దానిలో ఒక హీరో, హీరోయిన్, విలన్ పాత్రలుంటాయని, వాళ్ళతోనే కథ, సంఘటనలు ముడివడి వుంటాయని తెలుగు పాఠక జనం ఊహించే అవకాశం వుంది. కాని ఈ నవల దానికి మినహాయింపు. ప్రజాస్వామ్య సంప్రదాయాలను సాహిత్యం ప్రతిబింబించాలనే ఆలోచనతో పాత్రల చిత్రణలో సమతుల్యం పాటించాడు రచయిత.
‘ఊడలమఱ్ఱి’ ఈ వ్యవస్థకు సంకేతం. దీన్ని కూకటివేళ్ళతో పెకలించాలంటే ఏ ఒకరిద్దరివల్లనో అయ్యే పని కాదు. ఎన్నో కష్టాలకు, వ్యయ ప్రయాసలకు గురి కావల్సివుంటుంది. ఆత్మబలిదానాలు, రక్తతర్పణాలు అనివార్యం అవుతాయి. ఏది ఏమైనా ఇది ‘ఉన్నవాడికి లేనివాడికి మధ్య జరిగే అనంత సంగ్రామం’, ‘పరస్పరం సంఘర్షించిన శక్తుల’లోనే చరిత్ర ప్రగతి ఆధారపడి వుంది.