మా ద్విభాషా పుస్తకాల క్రమంలో మూడవ పుస్తకం ఇది. మొదటి పుస్తకం 'జాగృతి'కి పాఠకుల నుంచి ముఖ్యంగా యువత నుంచి అనూహ్యమైన స్పందన లభించింది. జాగృతి పుస్తకంలో కేవలం రెండు, మూడు పంక్తుల స్ఫూర్తి వాక్యాలను ఎన్నుకోవటం జరిగినది. పాఠకులకు స్వామి వివేకానంద బోధనలను సంక్షిప్తంగా పరిచయం చేయటానికి ఆ పుస్తకం ఉద్దేశించ బడినది. స్వామి వివేకానంద బోధనలను పాఠకులకు ఇంకాస్త వివరంగా పరిచయం చేయటానికి ఈ 'ధీరయువతకు...' పుస్తకాన్ని సంకల్పించాము. స్వామీజీ ధీర వాక్కులను మూల భాషలోనూ (ఆంగ్లంలో), మరియు తెలుగు అనువాదంతో సహా ఇవ్వడం వల్ల వాక్యం చక్కగా అర్థమవుతుందన్న మా భావన 'జాగృతి' పుస్తకం పొందిన ప్రజాదరణతో నిజమని నిరూపింపబడింది. ఇలాంటి పుస్తకాలను ఇంకా తీసుకురావటానికి మాకు ప్రోత్సాహం లభించింది.

ఆ ప్రయత్నంలో భాగమే ఈ ప్రస్తుత పుస్తకం. ఈ పుస్తకంలో ఒకే విషయానికి సంబంధించిన స్ఫూర్తి వాక్కులన్నింటినీ ఒక శీర్షిక క్రింద కూర్చటం జరిగినది. వరుసలోని ప్రతి సూక్తి క్రితం పేజీలోని సూక్తిని బలోపేతం చేస్తుండంటం వలన పాఠకుడు ప్రతి సూక్తినీ చక్కగా అర్థం చేసుకోవటానికి వీలుంది. కొన్ని భావాలు, సూక్తులు అక్కడక్కడ పునరావృతమై ఉండవచ్చు. అవి ఒకేరకంగా పునరావృతం కాకుండా ఒక పెద్ద సూక్తిలో భాగంగా ఉన్నాయి కాబట్టి వాటిని ఉద్దేశపూర్వంగా అలాగే ఉంచటం జరిగినది. స్వామి వివేకానంద సూక్తుల నుంచి అధిక ప్రేరణ పొందటానికి పాఠకులకు ఈ పుస్తకం ఉపయుక్తం అవుతుందని భావిస్తాము.

- ప్రకాశకులు