పన్నెండేళ్ళ శ్రీరాముడిలో పెల్లుబికిన తత్త్వ విచికిత్సా కల్లోలానికి వశిష్ఠమహర్షి చూపించిన పరిష్కారం, ఆత్మతత్త్వావగాహనకై కురిపించిన యుక్తుల వర్షం గజిబిజి అల్లికలైన ఉపనిషత్తులను వింగడించి నిరూపించిన సారం, రామాయణ రచనానంతరం వాల్మీకి మహర్షి మహాకవి చేతిలో కవితా రసమయంగా రూపొందిన తాత్త్విక కావ్యం అదే యీ యోగవాశిష్ఠం! దీని సారాన్ని అటు సనాతన సాంప్రదాయిక విద్యతోనూ ఇటు అధునాతన విజ్ఞానశాస్త్రంతోనూ సమన్వయించి కవి హృదయం శ్రోతలకు అందే లాగా అవధూత దత్తపీఠం విద్యాధికారి శ్రీ కుప్పా వేంకట కృష్ణమూర్తిగారు చేసిన ప్రవచనాలకి అక్షరరూపమే ఈ యోగవాశిష్ఠ హృదయము.
ఈ గ్రంథాన్ని వాల్మీకి మహర్షి ఆరు ప్రకరణాలుగా విభజించారు. వీటిలో మూడవ ప్రకరణమైన ఉత్పత్తి ప్రకరణం లో ఈ కనిపించే ప్రపంచానికి ఉత్పత్తి వుందా? లేదా? వుంటే, ఆ ఉత్పత్తి ఎటువంటిది? అనే విచారణ చేశారు. ఈ విషయాలు నిగ్గు తేలితే, ఈ ప్రపంచంయొక్క మూలస్వరూపం తెలుస్తుంది.