ఈ పుస్తకంలో ఉన్న వ్యాసాలు అన్నీ ఒక్క సారి కూర్చుని రాసినవి కావు; నాలుగైదు ఏళ్ల కాల వ్యవధిలో రాసేను. వీటిని అనేక పత్రికలలో ప్రచురించేను. కనుక అన్నిటిని ఒకే సారి, ఒకే వరుస క్రమంలో చదవాలనే నియమం ఏదీ లేదు. మిగిలిన అధ్యాయాలతో ప్రమేయం లేకుండా ఏ అధ్యాయానికి అది చదివినా అర్థం అవాలనే లక్ష్యంతో రాసేను. అధ్యాయాలని నాకు నచ్చిన వరుస క్రమంలో అమర్చేను.

ఈ పుస్తకంలోని పాఠ్యాంశం పురాణ కాలంలో మొదలయి నేటి వరకు నడుస్తుంది. పూర్వులు ఈ విశ్వ స్వరూపాన్ని ఎలా అర్థం చేసుకున్నారు? ఇప్పుడు మనకి ఎలా అర్థం అవుతోంది? విశ్వ రహస్యాలని ఛేదించడానికి తాత్త్వికులు చేసిన ప్రయత్నాలు ఎటువంటివి? భౌతిక శాస్త్రవేత్తలు చేసిన ప్రయత్నాలు ఎటువంటివి? ఈ రకం ప్రశ్నలకి వీలయినంతమట్టుకు సమాధానాలు చర్చించేను.

ఈ రకం పుస్తకం తెలుగులో రాయబూనుకోవడం సాహసమే. ఈ రకం పుస్తకాలు ఇంగ్లీషులో ఎన్నో ఉన్నాయి. ఆవి కూడ అర్థం అవాలంటే ఆధునిక విజ్ఞాన శాస్త్రంతో కొద్దో గొప్పో పరిచయం ఉండాలి. ఈ పుస్తకంలోని విషయాలన్ని అర్థం చేసుకోగలిగే సామర్ధ్యం ఉండాలంటే కనీసం ఉన్నత పాఠశాల వరకు అయినా “సైన్సు” చదివి ఉండాలి. అటువంటి నేపథ్యం లేని వారికి కొన్ని అధ్యాయాలు కొరుకుపడవు. అటువంటివారు ఆయా అధ్యాయాలని మినహాయించి మిగిలిన పుస్తకం చదవండి; పుస్తకంలో చెప్పిన విషయాలలో కనీసం 50 శాతం అందరికీ అందుబాటులో ఉంటుందనే నా నమ్మకం.

- వేమూరి వేంకటేశ్వరరావు