ఒక శాస్త్రవేత్త కనిపెట్టిన ఫార్మూలా....కొత్త విషయం... ప్రపంచగమనాన్ని మారుస్తుంది.
ఒక స్వాతంత్ర్య పోరాటం దాస్యశృంఖలాల నుంచి విముక్తి కలిగిస్తుంది.
ఒక వ్యక్తి సాధించిన విజయం వ్యవస్థకు స్ఫూర్తిని కలిగిస్తుంది.
ఆలోచన అభివృద్ధికి, కృషి సాధనకు పట్టుదల గెలుపుకు దారితీస్తుంది.
అలా ఒక వ్యక్తి ఆలోచన ఆశయంగా, మారి ఆచరణలో తెలంగాణా రాష్ట్రంగా ఏర్పడింది.
ఆ వ్యక్తి తెలంగాణా రాష్ట్ర ఉద్యమ సారథి, తెలంగాణ రాష్ట్ర తొలి ముఖ్యమంత్రి కల్వకుంట్ల చంద్రశేఖర రావు.
కెసీఆర్ గా సుపరిచితులు...
మనం పుట్టినప్పుడు మనకు తల్లిదండ్రులు ఒక పేరు అది ఆ కుటుంబానికి, బంధువులకు స్నేహితులకు మాత్రమే తెలుస్తుంది.
కానీ అదే వ్యక్తి విజయాలను సాధించినప్పుడు... తనలోని వ్యక్తిత్వాన్ని, ప్రతిభను, కార్యాచరణను, ఆశయాన్ని ఆచరణలో పెట్టినప్పుడు ప్రపంచమంతా గుర్తిస్తుంది.
అది ఉద్యమం కావచ్చు... సామాజిక సేవ కావచ్చు.. సరికొత్త ఆవిష్కరణ కావచ్చు.
మహాత్ముడు.. మదర్ థెరీసా, నెల్సన్ మండేలా, నేతాజీ, గ్రాహంబెల్, ఐన్ స్టీయిన్ ఇలా ఏ రంగానికి చెందినవారు అయినా ప్రపంచంలో ఒక కొత్త ఒరవడి. కొత్త ఆవిష్కరణ, ఇతరులకు స్ఫూర్తి కలిగించే పరంపరలో, చరిత్రలో నిలిచిపోతారు.
ఇతరులకు స్ఫూర్తిని ఇస్తారు.
అలా ఒక చరిత్ర సృష్టించిన వర్తమానపు కథానాయకుడు కెసీఆర్ అన్నది మనం ఒప్పుకుని తీరవలిసిన చారిత్రాత్మక వాస్తవం.
ఈ వాస్తవానికి ఒక అక్షర రూపం అనివార్యం. చరిత్రలో నిలిచిన ఈ చారిత్రాత్మక సంఘటన యువతకు, ప్రజలకు రేపటితరానికి తెలియజేయవలిసిన బాధ్యతగా భావించాను.
దాదాపు ముప్పై మూడేళ్ళ రచనా ప్రస్థానంలో జర్నలిస్ట్ గా, కాలమిస్ట్ గా నేను చేసిన రచనలకు ఇది కొద్దిగా భిన్నం.. విభిన్నం ..
కేసీఆర్ వ్యక్తిత్వాన్ని విశ్లేషించే చిన్ని ప్రయత్నం...
ఇది పూర్తిస్థాయి విశ్లేషణ కాదు... వార్తల ఆధారంగా, ఇతరులు వెలుబుచ్చిన, వర్తమానంలో జరిగిన సంఘటనలు...
ఒక రేఖామాత్రంగా స్పృశించిన సృజన.
ఈ పుస్తకం చదివి లీడర్ షిప్ క్వాలిటీస్ ను అర్థం చేసుకుని లేదా ఈ పుస్తకం స్ఫూర్తితో ఏ ఒక్కరు స్పందించి గెలుపును సాధించినా మరో కొత్తనాయకుడు తయారు కాబడినా మా ప్రయత్నం ఫలించినట్టే...

- విజయార్కె