ఒంట్లో కండ, తల లేకపోయినా
ఓ మహాశక్తి ప్రవాహాన్ని
ఆనందంగా మోస్తున్నాయి కరెంటు స్తంభాలు,

కడుపు, రొమ్ము లేకపోయినా
అగణిత మానవ జీవన ప్రయాణాల్ని
అపురూపంగా భరిస్తున్నాయి రైలు పట్టాలు,
కళ్ళు, కాళ్ళు లేకపోయినా
అనేకానేక ప్రాణి కోటి వాహన భారాల్ని
రకరకాలుగా నెత్తికెత్తుకొంటున్నాయి రోడ్లు,

గదినుండి కదలలేకపోయినా
సమస్త భాషా సాహిత్య కళా వైజ్ఞానిక సాంస్కృతిక సారాన్ని
వివిధ వర్ణ విశేషాలతో ప్రదర్శిస్తున్నాయి కంప్యూటరు యంత్రాలు...

ఆనందంగా అనంత ప్రాణ శక్తి యుక్తు లిస్తూ
ఆప్యాయంగా అక్షర విభవా లిస్తూ
కూరిమితో కోటి జీవరాసుల్ని మోస్తూ సాకుతున్న ఈ భూమితల్లికి
మనిషి శోధించి సాధించి సృష్టించిన విజయా లన్నీ
నిత్యం ప్రణమిల్లుతూనే వుండాలి.