ఉ.
చక్రము నేల లేదు, నృపచక్రమునెల్ల వధించినావు, గో
చక్రము వారిధారలకు సంకటిలంగ బరాక్రమక్రమా
తిక్రమణంబుతో నగపతిం గొనగోట ధరించినావు, న
క్రాక్రమితద్విపాయికిని క్రందన మాపితి గాదె! శ్రీపతీ!

భావం:
శ్రీపతీ! నువ్వు భూమినైతే ఏల లేదుగానీ నృపసమూహాన్ని (చక్రము) వధించావు (కృష్ణావతారంలో). గోవులు వర్షంలో బాధపడుతూ ఉంటే నీ పరాక్రమంతో, గోవర్ధనాన్ని (నగపతిన్) కొనగోట ధరించావు. మొసలిబారిన పడ్డ ఏనుగు (ద్విపాయి) కష్టాన్నీ తీర్చావు స్వామీ!