శ్రీకృష్ణుడు పరమదయాస్వరూపుడు. తన భక్తులంటే స్వామికి ఎంతో ప్రేమ, ఎంతో అనురాగం. ఎల్లవేళలా తననే స్మరిస్తూ ఉండే భక్తులను నిత్యం కంటికి రెప్పలా కాపాడుతుంటాడు. ఒక్కసారి గొంతెత్తి శ్రీకృష్ణా! గోపాలా! గోకులనందనా! అని నిష్కళంక భక్తితో పిలిస్తే చాలు. తక్షణం వచ్చి ఆ భక్తుని ఆదుకుంటాడు. ఎంతటి ఆపదలో ఉన్నా క్షణంలో ప్రత్యక్షమై రక్షిస్తాడు.

ఆ శ్రీకృష్ణులవారే అనుగ్రహించిన ఈ వ్రతం ఆచరింపటం అతి సులభం. ఎవరైనా, ఎప్పుడైనా, ఎటువంటి నియమనిష్టలూ లేకుండా తేలికగా ఆచరింపవచ్చును. ఈ వ్రతం ఆచరిస్తున్న ప్రదేశంలో బాలకృష్ణుడు అదృశ్యరూపంలో నాట్యమాడతాడు. అక్కడ ఉన్న భక్తులందరినీ తప్పక అనుగ్రహిస్తాడు. వీలున్నప్పుడల్లా మనమందరం ఈ వ్రతం ఆచరించి ఆ స్వామి అనుగ్రహానికి లోనవుదాం. మన జీవితాలు శుభప్రదం చేసుకుందాము.

- తిమ్మరాజు విశ్వపతి రామకృష్ణమూర్తి