''మూలాల్లోకి వెళ్ళి ప్రశ్నించటం, శోధించటం, ఏదో కొత్తదనాన్ని కనుగొన్నామనుకున్నదానికన్నా, ఆ అంశానికీ, మనకీ ఉన్న సంబంధ బాంధవ్యాలను నిర్దిష్టంగా నిర్వచించుకోవటం... వీటితోపాటు ఎప్పుడూ ఏ విషయంపట్లా 'ఇది ఇదే' 'ఇది ఇంతే' అనే నిర్ణయాన్నికొచ్చేయకుండా ఆజీవిత పర్యంతం ఎప్పుడైనా, ఏ క్షణాన్ష్నెనా మార్పునీ, చేర్పునీ కూర్చుకునేందుకు సంసిద్ధంగా ఉండగలగటం... ఇలాంటి ఆరోగ్యకరమైన ఆలోచనాధోరణి అలవడేలా చేశారు.''

- 'సిరివెన్నెల' సీతారామశాస్త్రి

''కళ్ళముందు ఆకాశాన్నితాకే దేవాలయం నిర్మించబడి ఉన్నప్పుడు దానికి శిల్పి ఎవరు అనే ప్రశ్నేగాని, శిల్పిలేరని చెప్పగలిగే అవకాశమేముందీ? అన్ని గొప్ప లక్షణాలకే కాదు ఆయన లక్ష్యాలకి, గమనానికి, గమ్యానికి డా. యోగిగారే మూలమని చెప్పాలా? ఈ ప్రవాహాలన్నింటికీ గంగోత్రి ఆయనేనని వివరించాలా?''

- వై. సత్యారావు

''మానవుని అశక్తతను నగ్నంగా నడిరోడ్డుమీద నిలబెట్టేది చావు. మన ప్రాణం అయినా ఇచ్చి బ్రతికించుకుందామన్నా బ్రతికించుకోలేని అశక్తత! మనం నిరంతరం ఏ భరోసా మీద బ్రతుకు సాగిస్తామో, ఏ సుఖం అనుభవిస్తూ రోజులు, నెలలు, సంవత్సరాలు గమనించకుండా బ్రతికేస్తూ ఉంటామో ఆ అహంకారానికి భగవంతుడు కొట్టే చావుదెబ్బ! నేలమట్టం చేసే అవమానం!

- చేంబోలు శ్రీరామశాస్త్రి