పరిమళానికి పాదాలుంటాయి

రెక్కలూ ఉంటాయి

మనల్ని తన రెక్కల మీద ఎక్కించుకుని

అందమైన లోకాల్లో తిప్పుకువస్తుంది

బాల్యంలో అమ్మ పాడిన పాట

మళ్ళీ ఇప్పుడు మననం చేసుకుంటే

అదో గొప్ప పరిమళం

చిన్నప్పుడు కురిసిన

వర్షపు జల్లు

ఓ పురా పరిమళమై

మళ్ళీ వికసించినప్పుడు

పచ్చిపరిమళం గుప్పుమంటుంది

ఒకనాటి పెరట్లో బంతిపూలు

ఆ వెనకే ముద్దమందారాలు

నా కోసం మళ్ళీ ఇప్పుడు వికసించి

సరికొత్త పరిమళాన్ని పంచుతాయి

కళ్ళతో పలకరించిన

స్నేహితుని నవ్వుకీ పరిమళముంటుంది

దాని వెనక వెళ్ళ గలిగితే

ఎన్నో తీపి గురుతుల పరిమళాలు

కార్తీక పున్నమిలో

పచ్చ 'ధనాన్ని' కోల్పోయి

తెల్లముఖాలేసిన చెట్లూ ఓ పరిమళమే

ఏటి ఒడ్దున నడుస్తుంటే

నీటిలో జలకాలాడే చంద్రుడూ ఓ పరిమళమే.

పరిమళం శ్వాస

మీరు నరయంత్రం కాకముందే

కాస్త పరిమళాన్ని మూటగట్టుకోండి

మనిషిగ మిగిలి పోతారు.