అరవైయవ దశకం చివర్లో కలంపట్టిన శ్రీపాద స్వాతి "ఉస్మానియా విశ్వవిద్యాలయ విద్యార్థి రచయితల సంఘం" ఆవిర్భావం నుంచి గత నాలుగు దశాబ్దాలుగా రచనలు చేస్తున్న విలక్షణ రచయిత్రి. కథ, నవల, కవిత - తనదైన ముద్రతో రాయడం ఆమె ప్రత్యేకత.

అభివ్యక్తిలో క్లుప్తత, గాఢత అభినందించదగ్గ అంశాలు. జీవితాన్ని, సమాజాన్ని లోతుగా పరిశీలించిన ఈ రచయిత్రి తన రచనల్లో అనుభవశకలాలను ప్రతిఫలింపచేస్తారు. ఏ వాదానికి కట్టుబడని ఈమె మానవీయ దృక్పథంతో రచనలు చేస్తున్నారు.

ఈ 'పునరాగమనం' నవల లోగడ ' కౌముది' అంతర్జాల పత్రికలో ' పడమట సూర్యోదయం' పేరిట వరుసగా ప్రకటించబడి సంచలనం సృష్టించింది.

స్వాతి తెలుగులో సృజనాత్మక రచయిత్రి మాత్రమే కాకుండా తెలుగు నుంచి ఆంగ్లంలోకి, ఆంగ్లం నుంచీ తెలుగులోకి సమర్థంగా అనుసృజన చేయగల అనువాదకురాలు.

35 మంది రచయిత్రుల తెలుగు కథలను ఆంగ్లంలోకి అనువదించారు. సాహిత్య అకాడెమీ కోసం భవానీ భట్టాచార్య జీవిత చరిత్రను ఆంగ్లం నుంచీ తెలుగులోకి అనువదించారు.

- ప్రకాశకులు