"పదండి ముందుకు" పుస్తకంగా రాక ముందే నవ్య వీక్లీలో వారం వారం ఎంతో ఉత్సాహంగా ఉత్సుకతతో చదివాను. నేను స్వయానా విజ్ఞాన్‌లో ఇంటర్మీడియట్ మరియు ఇంజినీరింగ్ చదివాను. ఇప్పుడు అమెరికాలో ఉన్నాను. కస్టపడే తత్వం, పోటీ ప్రపంచంలో నెగ్గడం వంటివి ఇక్కడే అలవడ్డాయి అనడంలో సందేహం లేదు. మనకు తెలిసిన వ్యక్తి గురించి తెలియని గొప్ప నిజాలు అరుణ పప్పు గారు రాసిన ఈ పుస్తకం ద్వారా తెలుసుకోవడం ఒక గొప్ప అనుభూతి. స్వయంగా పరిచయం లేకపోయినా విద్యార్ధులకు, తల్లిదండ్రులకు "విజ్ఞాన్ రత్తయ్య" అనే పేరు ఆంధ్ర దేశం అంతా సుపరిచితం. ఎందరో విద్యార్ధుల భవిష్యత్తును తీర్చిదిద్దిన ఈ విజ్ఞాన్ సామ్రాజ్యపు నిర్మాణం వెనక ఉన్న కస్టం, ఓర్పు, నేర్పు ఈ పుస్తకం ద్వారా మనం తెలుసుకోవచ్చు. ఒక వ్యక్తి శక్తి గా ఎలా ఉద్భవించాడో తెలుసుకోవచ్చు. విద్యారంగానికి ఎంతో సేవ చేసిన రత్తయ్య గారి గురించి అందరూ తప్పక చదవాల్సిన అవసరం ఉంది. అరుణ పప్పు గారి రచన ఆద్యంతం అద్భుతంగా సాగి పాఠకులను రంజింపజేస్తుంది. ఇంకెందుకు ఆలశ్యం..పుస్తకం చదివేందుకు...పదండి ముందుకు..