ఒంటరి చేల మధ్య ఒక్కత్తే మన అమ్మ

నాగళ్ళు చాళ్ళు తీసినప్పుడు
గింజలు చల్లినప్పుడు
నాట్లు నాటినప్పుడు
కంకుల్లో పాలు పొదిగినప్పుడు
ఆశగా అవలంబనగా మన అమ్మ.

పైర్లు నిండుగా వంగినప్పుడు
పాటలప్పుడు, పంటకోతలప్పుడు
పంట చేటల్తో తూర్పుకెత్తినప్పుడు
తృప్తిగా అన్నం ముద్ద కలిపినప్పుడు
దయగా, ధైర్యంగా మన అమ్మ.

కలలు కన్నప్పుడు
కన్నీళ్ళు పొంగినప్పుడు
పొద్దుపొడిచినప్పుడు,
పొద్దు కుంగినప్పుడు
ఒక్కరీతినే కన్నతల్లి మన అమ్మ.

ఒంటరిచేల మధ్య
ఒక్కత్తే మన అమ్మ.