1878 నుంచి 1977 దాకా గడిచిన నూరేళ్ళలో తెలుగు సమాజం ఏఏ మలుపులు తిరిగింది? ఏఏ ఎగుడుదిగుడులకి లోనైంది? వర్గవైరుధ్యాలు ఏ స్థాయిలో వ్యక్తం అయ్యాయి? ప్రజా చైతన్యం ఎలా వెల్లువెత్తింది? ఈ నూరేళ్ళ తెలుగు సాహిత్యచరిత్రంటే నూరేళ్ల తెలుగుభాషా చరిత్ర మాత్రమే కాదు... నూరేళ్ళు తెలుగునాట నడిచిన రాజకీయార్థిక సామాజిక చారిత్రక విశ్లేషణ కూడా. అందుకు ఈ నవలల పరిచయం ఒక చిరుదివ్వెగా ఉపకరిస్తుందని ఆశిస్తున్నాం. ఈ ప్రచురణ ప్రయత్నంలో రచయితల జనన మరణ తేదీలు సేకరించటంలో చాలా ప్రయాసపడ్డాం. కొంతమంది తేదీలు ఒక్కోచోట, ఒక్కో రకంగా ఉన్నాయి. నూరేళ్ళ చరిత్రనే పట్టుకోలేకపోవటం మన వెనకబాటుతనాన్ని, చారిత్రక దృష్టిలోపాన్ని ఎత్తి చూపుతోంది.