కార్చిచ్చు రగలకుండా కర్ఫ్యూ విధించడం ఒక పద్ధతి అయితే
కార్చిచ్చునీ కర్ఫ్యూని ఒకే చేత్తో నిర్వహించడం ఇక్కడి ప్రత్యేకత
***
శత్రువు ముసుగువీరుడు కాదు
తన వికృతమైన ముఖకవళికలకి
మన ముఖం తగిలించుకుని తిరుగుతున్నాడు
***
ఆశపోతు అమెరికా అందానికి కొలబద్దని
ఒక ఆడపిల్ల రూపంలో మా కళాశాలకి పంపింది
ఇప్పుడు తెల్ల అబ్బాయిలూ నల్ల అబ్బాయిలూ
ఒక అబద్ధం కోసం యుద్ధం చేస్తున్నారు
***
నరానికి సూది గుచ్చితే రక్తమే వస్తుంది
నగరానికి సూది గుచ్చితే భయం వచ్చింది
***
పదేపదే నువు వక్రీకరించి వదిలిన ఉపమానాల మధ్య
నా చర్మగీతం ఎంత చేదిక్కిపోయిందో తెలుసా....?
***
ఎన్ని ప్రమాదసూచికలుంటే
అన్ని ప్రాజెక్టులూ, లాప్‌ట్యాపులూ తెరుచుకుంటాయి
వాటి దంతాల మధ్య నా గ్రామాలు
నెత్తురోడుతూ కనిపిస్తాయి