గొప్ప కావ్యానికి ఒక లక్షణం అది ఎప్పుడూ కొత్తగా నవనవలాడుతూ వుండటం.

గొప్పకవులు ఏ కాలం వారైనా సమకాలికులే.

వాల్మీకి వ్యాసుడు కాళిదాసు అలాంటివారు. వారి కావ్యాలు అలాంటివి.

బుద్ధుడు ఎంత గొప్పకవో ధమ్మపదం చూస్తే తెలుస్తుంది.

ఆ మహానుభావుల్ని చదువుకొని ఆనందించి తనకూ, ఈనాటి కాలానికీ, ఏమి చెబితే ఎట్లా చెబితే మేలు జరుగుతుందని అనుకొన్నాడో అట్లా తన భాషలో చెప్పిన అనువాదాలివి.

* * *

అందరిలోనూ కాలం
కడు శక్తివంతమైంది
దానికి ప్రత్యేకంగా ఎవరిమీదా
అధికమైన ప్రీతి లేదు
శూరులు బలవంతులు
యుద్ధంలో నిలబడి నెగ్గినవారు
కాలం తోసుకొచ్చినపుడు
ఇసుకతో కట్టిన అడ్డుకట్టల్లా
కొట్టుకుపోతారు