తడిలేని క్షణాలు
గరుకుగా జారిపోతూనే వుంటాయి
సంక్షుభిత సంధ్యల్లోకి

పచ్చనాకుల మీద రాలే
తొలి కిరణాల పుప్పొడి కోసం
చెట్టుగ మారి నిత్యం తపస్సు చేయడం

జీవితం ఎక్కడో వుంటుంది
చెక్కని శిల్పంలా
నువ్వే శిల్పిగా మారాలి
నడిచే పాదాల మీద
రాలుతూనే ఉంటాయి
పూలూ ముళ్ళు
పూలను ఏరుకోవడమే జీవితం
వెన్నెల్లో ఏడు రంగులూ వుంటాయి
నువ్వే చిత్రించాలి ఇంద్రధనస్సు

చీకటిని
తాగితే తాగనియ్యి వెన్నెలంతటినీ
మళ్ళీ సూర్యోదయమవుతుంది

ఏదీ నిలదడు
ఏదీ కూచోదు
ఏదీ శాశ్వతం కాదు
ఒక్క నీ చిరునవ్వు తప్ప