దైవజ్ఞ శిరోమణి త్రిస్కంధ జ్యోతిషశాస్త్రవేత్త తత్త్వజ్ఞుడైన వరాహమిహిరుడు 'లఘు జాతకము'ను రచించెను. బృహజ్జాతకమునకు సంక్షిప్తరూపముగా లఘు జాతకమును రచించెను. లఘు జాతకము రెండవ శ్లోకములో గ్రంథకారుడీవిధముగా తెల్పెను. ''నేను మొదట అనేక ఛందస్సులలో హోరాశాస్త్రమును నిర్మించితిని. తర్వాత దాని సారభూతముగా ఆర్యాఛందములో ఈ గ్రంథమును రచించితిని''. ఈ గ్రంథములో జన్మ సంబంధమైన అన్నివిషయములను తెలియజేసెను. గర్భస్థితి నుండి నిధనపర్యంతము అన్నివిషయముల శుభాశుభముల ఫలితములను తెల్పెను. రాశిప్రభేదాధ్యాయము నుండి నష్టజాతకాధ్యాయము వరకు 18 అధ్యాయములలో అనేకమహత్వపూర్ణ జ్యోతిష విషయములను తెలియజేసెను.