నిత్యవ్యథాభరితకుంతి! అదేమిచిత్రమో, ఆమె జీవితమలా సాగింది! బ్రతికినన్నాళ్లూ ఒక్కక్షణం కూడా ఆమెకు ఊరటలేదు. సౌఖ్యమనేది పెద్దమాట! జాలిపడాలా? కుంతి కష్టాలు మరెవ్వరికీ రాకూడదని కోరుకోవాలా?
కుంతి భోజుని పుత్రిక! దిక్పాలకుల సంతానాన్ని పొందిన మాత! సాక్షాత్తూ పరమాత్ముడైన శ్రీకృష్ణునికి మేనత్త! ఆమెపొందిన వైభవం – అనుభవించిన సౌఖ్యం ఏమైనా ఉన్నదా? ఎప్పుడూ గుండె కోతలే!
సర్వబంధు క్షయం జరిగిన తర్వాత పాండవ పట్టాభిషేకం! అప్పుడు రాజమాతగా కుంతి ఎంత ప్రాభవం అనుభవించిందో ఆ భగవంతునికే ఎరుక!
జీవితమంతా ఆమెది నిత్యపోరాటమే! అంతులేని ఆరాటమే! విధి ఆడిన విపరీత నాటకంలో – సృష్టిలోనే లేని ఒక వింత పాత్ర కుంతి!