నాలుగో సహస్రాబ్ది 3260.

అణుయుద్ధాలూ, ప్రకృతి వైపరీత్యాల వల్ల భూమి ఎక్కువ మేర నశించిపోయి మానవులు చాలావరకు ఇతర గ్రహాలకి వలస పోయి అంతర్‌గ్రహ నాగరకత విలసిల్లుతున్న కాలం.

అంతర్‌గ్రహ యానాలు, సమాచార వ్యవస్థా, వైద్య రంగాల్లో మానవులు ఎంతో ప్రగతిని సాధించారు. ఇప్పటి సెల్ ఫోన్స్‌లాగా, రోబోట్స్ లాగా, ఇంటర్‌నెట్‌ లాగా ఇంటర్‌గలాక్జిక్ నెట్ కాంతివేగంతో ప్రయాణించే అంతరిక్ష నౌకలూ వృద్ధి చెందినా మనిషి భావాలు, ఆలోచనలూ, వ్యక్తిత్వమూ ఎప్పటిలాగానే వున్నాయి. వెనకబడిన భూమి నుంచి మానవులు గ్రహాలకి వలసపోయే ప్రజలూ, స్పేస్ ప్లాట్‌ఫారంలూ, వివిధ జాతుల మానవులూ, మానవులని బోలిన హ్యుమనాయిడ్స్.... అది ఒక సరికొత్త విశ్వం!

మధ్య ఆసియాలోని ఇండికా సెంట్రల్ యూనివర్సిటీలో బయోమెడికల్ ఇంజనీర్‌గా పనిచేస్తున్న హనీ అనే యువకుడికి బాల్యం నుంచి సయోనీ అనే అందమైన కుజ యువతి కలలోకి వస్తుంటుంది. ఆమెని చూడాలనే కోరికతో కుజగ్రహం చేరుకున్న అతని జీవితంలో విచిత్రమైన మార్పులు చోటు చేసుకుంటాయి. కుజునిలో నివసిస్తున్న మానవ కాలనీకీ, అదే గ్రహంలో అరుణ భూముల రాజ్యంలో ఉన్న మాంత్రికులకీ కుజగ్రహ ఆధిపత్యం కోసం జరుగుతున్న యుద్ధంలో చిక్కుకుంటాడు హనీ. ప్రేమ కోసం బయలుదేరిన హనీ తన గురించి కొత్త విషయాలు తెలుసుకోడం, అద్భుత శక్తులు సంపాదించడం, కొత్త లక్ష్యంతో భూమికి తిరిగి రావడం....

ఆ క్రమంలో జరిగి చిత్ర విచిత్రాలను మనోహరంగా వర్ణించిన కథ ఇది!

భవిష్యత్ నాలుగో సహస్రాబ్దిలో జరిగినట్లుగా ఊహించి కల్పనకి సైన్సు మిళితం చేసి కొత్త ప్రయోగంగా డా. చిత్తర్వు మధు రాసిన స్పేస్ ఒపేరా ఇది!

* * *

వార్ ఫర్ మార్స్ అని ఇంగ్లీషులో తానే రాసిన నవలకు రచయిత స్వీయానువాదం. రచన మాస పత్రికలో ధారావాహికగా ప్రచురించబడింది. దీనికి ఇంకా సీక్వేల్స్ రాయాలనే తపనకి ఇది పునాది.