తెలుగుతనాన్ని అక్షరాలనిండా నింపి కథలు, నవలలు, పాటల రూపంలో మనకందించిన మహోన్నత సాహితీమూర్తి శ్రీ మల్లాది రామకృష్ణ శాస్త్రి గారు.
ఆధునిక నవలా సాహిత్యంలో అనర్ఘరత్నంగా కీర్తించబడే మల్లాది వారి రచన ఈ 'కృష్ణాతీరం' నవల.

*****

మనం కృష్ణాతీరం వాళ్ళం!
పేరు గొప్పేకాదు: ఎక్కడికి వెళ్లినా పెద్దపీట వేయించుకుంటాం!''
''ఓయబ్బ! - ఏటి ఒడ్డున పుట్టిన వాళ్లెవరైనా యింతే!''
''అటు పెన్నలో వాళ్లూ, యిటు గోదావరిలో వాళ్లూ, - ఏడేడు తరాలనుంచీ యిదే రాంభజన''
''వాళ్ళు చేశారంటే సబబుంది! అక్కడ నన్నయ్య, యిక్కడ తిక్కన్న పుట్టుకొచ్చారు...''
''ఆ, - భారతమూ పుట్టుకొచ్చింది! మూడూళ్లు తిరిగితేకాని ముడిపడలేదు. కృష్ణఒడ్డున కూచుని సంకల్పం జెప్పుకుని, ఒంటిచేతి మీద భాగవతం వ్రాశాడు, ఆ పేద బ్రాహ్మడు! అన్నీ నదులే, కాని, యిదిరా నాయనా తేడా!

*****

ఇహ బ్రాహ్మణీకం అంటావా!
చిత్తశుద్ధి - సదాచారం, వినయం, వివేకం - యివి బ్రాహ్మణ లక్షణాలు. అంతే కాని, ఫలానా యింట్లో పుట్టడం కాదు. యిప్పటి మన సంకుచిత దృష్టితోనే చూస్తే - మన లెక్క ప్రకారం, మంత్రద్రష్టలైన ఋషుల్లో, యెంతమంది బ్రాహ్మణులున్నారు. ఒక్కడో అరో మినహాయిస్తే – తతిమ్మా వారందరూ, అనులోమ ప్రతిలోమముల ఫలితాలే కద!-