పనమ్మాయి చేతిలో చీపురు కలమే,
రైతు చేతిలో నాగలి కలమే,
మనుషుల కోసం ఏ పనిముట్లు అందుకున్నా కలమే...

***

శబ్దం అంటే ఒకసారి తూలి పడటం,
నిశ్శబ్దం అంటే పదిసార్లు తగిలిన దెబ్బలకు మందు పూసుకోవటం,
తర తరాలనుండి రాత్రికి
పడటం, మందు రాసుకోవటంతోనే తెల్లారుతోంది.

***

మనలో ఎప్పుడూ ఒక ప్రేమ ఆరని జ్వాలలా రగులుతూనే వుండాలి,
సూర్యు డొస్తున్నాడంటే మన మంతా ఎప్పుడూ తూర్పువైపే నిలబడాలి.

***

పువ్వుల్ని తూక మెయ్యటం తప్పు,
పైగా రాళ్ళతో తూక మెయ్యటం ఇంకా పెద్ద తప్పు,
నువ్వు నీ అవసరాల కోసం
తయారుచేసుకొన్న కొలమానాల రాళ్ళతో
తూక మెయ్యటం ఇంకా ఇంకా పెద్ద తప్పు.

***

జీవితం చెట్టుకు పిచ్చి కాయ లెందుకు!
ప్రాణం వెళ్ళిపోయినా నిలిచే “మంచి పేరు" కాయ ఒక్కటి చాలు.