మనిషి బుద్ధిజీవి కాబట్టి, యీ భూగోళం దానిపైని సమస్త జీవకోటి తన కోసమేనని అనుకుంటాడు. ఇతర ప్రకృతి వనరులు, భూగర్భ సంపదలతో సహా తనవేననే భ్రమలో వుంటాడు. అన్నిటితో పాటు తనూ వొక జీవినని ఎప్పుడూ అనుకోడు.

అందుకని సృష్టిలోని సమస్త చరాచర వస్తుకోటితో మనకు సంబంధాలు వుండి తీరుతాయి. అందుకే మానవ సంబంధాలను ఎంచుకున్నాను. వీటిని దేనితోనైనా ముడిపెట్టవచ్చు. ఈ గోళంలో జడ చేతన పదార్థాలు అయిపోతే మరో గ్రహానికి వెళ్లి సంబంధాలను కొనసాగించవచ్చు. దీనివల్ల రచనా వస్తువుకి కరువు యిప్పట్లో రాదని మీ లాగే నేనూ నమ్మికతో వున్నాను. దేవులపల్లి కృష్ణశాస్త్రి ఒక కవితా సంపుటిని ఆవిష్కరిస్తూ - "మనం జాగ్రత్తగా పరిశీలించినట్లయితే యీ కవిగారి రచనలలో అక్కడక్కడ కవిత్వం కూడా కనిపిస్తుంది" అని స్పష్టం చేశారు. అలాగే మీరు యీ పుస్తకంలోని వ్యాస పరంపరను శ్రద్ధగా చదివినట్లయితే, అక్కడక్కడ హాస్యం కూడా తగులుతుందని మనవి చేస్తున్నాను.

- శ్రీరమణ