ఎద సవ్వడి

నిన్నటిదాకా వరండా కళకళలాడింది
ఆయన బోసి నవ్వుతో
ఈ రోజు చిన్నబోయింది
ఖాళీ స్థలంతో
తప్పదని ఒకటవ తారీఖు
విచారం వెళ్ళబోసింది
నెలదాకా తనకు విరామమని
కుర్చీ కళ్ళనీరు పెట్టుకుంది
ఇద్దరన్నదమ్ముల ఘనకార్యం
ఈ వంతుల నేపథ్యం
తరతరాలుగా వేళ్ళూనిన సంస్కృతి
కానరాని చోటికి పారిపోయింది
నరనరాన రక్తంలా పాకిన సంప్రదాయం
అటక ఎక్కి దిక్కులు చూస్తోంది
ఇప్పుడు మనుషుల మధ్య
అంతా ఆర్థిక సంబంధాలే
అనుబంధాల సవ్వడి
వినిపించటం మానేసింది
ఏం చేస్తాం?
కళ్ళప్పగించి చూడటమే !
చెబితే వింటారా ఈనాటి పుత్రరత్నాలు
స్వచ్ఛమైన ప్రేమలో
ఎంతో తియ్యదనముందని !!

- విపుల
మార్చి 2018