మూర్తీభవించిన ఆంధ్రతేజం శ్రీ మల్లంపల్లి సోమశేఖర శర్మ గారు. ఆంధ్ర చారిత్రక పరిశోధకులలో, తొలితరం వారిలో అగ్రగణ్యులు,పూజనీయులు.
" చరిత్ర అంటే మనుష్యుడు చేసిన కృషి, అనుభవజ్ఞానం" అన్న మహా మనీషి. ఆయన చూపిన తోవ, తర్వాత ఎందరో నవ చరిత్రకారులకి అప్పటికీ-ఇప్పటికీ, ఎప్పటికీ మార్గదర్శకం.

శాసన ఆధారాలను, సాహిత్య ఆధారాలను ఎంతో క్షుణ్ణంగా పరిశీలించి, పరిశోధించిన తరువాత చరిత్ర నిర్మాణం చేశారు. నాటి కవులు, సాహితీవేత్తలు, చరిత్రకారులు, లిపిశాస్త్రజ్ఞులు, పరిశోధకులు అందరికీ మద్రాసులో సోమశేఖరశర్మ గారి యిల్లు విడిది కేంద్రం. వివాదాలకు అతీతమైన వ్యక్తిత్వం శర్మగారి సొంతం.

శర్మగారు రాసిన చరిత్ర వ్యాసాలలో కొన్నింటిని మోదుగుల రవికృష్ణ గారి సంపాదకత్వంలో, మిత్రమండలి ప్రచురణలు వారు ప్రచురించారు. ఇందులోని వ్యాసాలు ఎక్కువగా నాటి సామాజిక జీవనానికి ప్రతీకలు. పాదసూచికలు, ఛాయాచిత్రాలు సంపాదకుని కృషికి ప్రతీకలు. ప్రాచీనాంధ్ర దేశంలో శరన్నవరాత్రుల గురించి, అమరావతీ స్తూపము గురించి, నాగార్జునకొండ గురించి ఇంకా మరెన్నో విలువైన వ్యాసాలు ఇందులో పొందుపరచబడినవి. చరిత్రాభిమానులు తప్పనిసరిగా చదవవలసిన పుస్తకం.