నర్సారాయుడు, ధర్మారాయుడు ఏం చేయాలో తోచక తలలు దించుకున్నారు. వెంగళరాయుడైతే అవమానభారంతో క్రుంగిపోతున్నాడు! కలలో కూడా వూహించని దుష్పరిణామం?

బొబ్బిలి చరిత్రలో మాయనిమచ్చగా మిగిలిపోయే ఘట్టమా? ఎలా? దీని బారినుండి తప్పించు కోవడం ఎలా? ఆ పరిస్థితినుంచి తప్పించగల యోధులే బొబ్బిలి గడ్డ మీద లేరా?

"ఎవరురా, బొబ్బిలి గడ్ద మీద తొడకొట్టి సవాలు చేసే మొనగాడు?" ఖంగుమని జనం మధ్యలోంచి వినవచ్చిందో కంఠం గంభీరంగా.

అంతా తలలుతిప్పి అటు చూసారు. జనం వినయంగా ప్రక్కకు తప్పుకుని దోవనిస్తున్నారు. ఆ దారిగుండా గోదాకేసి వస్తున్నాడో భారీకాయుడు. దట్టంగా చుట్టిన తలపాగా, దుస్తుల మాటున ఎంత దాచాలన్నా దాగని కండలు, మెలితిరిగిన బుగ్గమీసాలు, వేణుగోపాలునిపై భక్తికి సూచనగా నామాలు....

ఎవరు... ఇంకెవరు....?