“మైగాడ్! ఇది కుంగ్‌ఫూ విద్యా పీఠానికి చెందిన జేబుగుడ్డ!!” దాన్ని చూడగానే ఆశ్చర్యంగా అన్నది సుమీ ఇవాటో.

“కరెక్ట్ మైడియర్ సుమీ.... కుంగ్‌ఫూ విద్యాపీఠంలో భారతదేశం నుంచి వచ్చిన షాడో అనే గజదొంగ విద్య నేర్చుకుంటున్నాడు. అరివీర భయంకరులైన నింజా గురువుల్నే మూడు చెరువుల నీళ్ళు తాగించిన మనిషి అతనని నాకు ఆలస్యంగా తెలిసింది.... లిన్‌ఫాంగ్ మరణించిన ప్రదేశంలో దొరికిన ఈ జేబుగుడ్డను ఈ రోజునే నాకు అంద చేశారు మనవాళ్ళు....” అంటూ చేతుల్ని వెనక్కి కట్టుకొని పచార్లు మొదలెట్టాడు ముసుగు మనిషి.

“అయితే వాళ్ళని ఆపటం మనకు చేతకాదా? ఎదురు పడినప్పుడల్లా ఏదో ఒక అఘాయిత్యం చేసి పోతున్న ఆ దుర్మార్గుల్ని అలా గాలికి వదిలేయవలసిందేనా?” ఆవేశంగా అడిగింది సుమీ ఇవాటో.