చినుకులు

వూరు వలస ముల్లెలు
గట్టుకొని ఎదురుచూస్తుంది
వూరి సుట్టు గుట్టలు

ఆకాశాన చంద్రుడు చుక్కలు
చంద్రుడు సిల్లంకల్లమైండా
సుక్కలే కుప్పగూడి ముద్దయినయా...

వాగు ఎండు డొక్కయింది
నీళ్లను యిసుక వూటల్ని
ఏ దొంగలు దోక్కపొయిండ్రో...

గోదారి లోయ చుట్టూ
పొంగుతున్న బొగ్గు గనులు
ఏ బాంచలకు బాంచ చరిత్రల
సమాధుల చీకటి పొరలో...

గ్రేటర్‌ పటాల్లో
కాటగల్సిన పల్లె పక్షికి
పట్నాల సిమిటి కొమ్మలు
సందుబుట్టనిస్తయా

కొండ సుట్టూర బండలు
ఎన్నడూ నీళ్లకై లేవని
ఆవుల మందలు

బాల కార్మికులు
చెమట చెత్త కుప్పల్ల
పలిగిపోయిన
అక్షరాల పలకలు

- మన తెలంగాణ ద్వితీయ వార్షిక ప్రత్యేక సంచిక, మార్చి, 2007