చాలా దూరమే జరిగింది ప్రయాణం

కదలికలన్నీ వ్యూహాలన్నీ అవగతమౌతున్నపుడు

నీ నా చలనాలన్నీ

ఒట్టి అనిర్ధారిత సమీకరణాలే

జవాబు రాదు... నడక ఆగదు

సరైన జవాబు రావాలంటే

సంధించబడుతున్న ప్రశ్న సరిగా ఉండాలి...

* * *

స్ట్రెచ్... సాగదీసుకోవాలి.. శరీరాన్ని... మనసును... హృదయాన్ని దిగంతాలదాకా

విస్తరిస్తున్నప్పుడు మనిషి ద్రవిస్తూండడం

అశ్రువులతో అభిషిక్త ఐనపుడు మనిషి శుద్ధి ఔతుండడం తెలుసుకుందామె

అప్పుడామె

మాటకంటే మౌనం గొప్పదనీ... మౌనంకంటే నిశ్శబ్దం ఇంకా గొప్పదనీ

శబ్దం అశబ్దంగా మారుతున్న వేళ

విస్ఫోటించే జ్ఞానకాంతుల గురించి తెలుసుకుంది...