క్షణాలలో అన్ని తెలుగు పుస్తకాల మీద ధూళి పేరుకుపోయి, తెలుగుకి ప్రాచీన భాష హోదా లభించింది. కారణం యేమిటంటే తెలుగుని అత్యాధునిక ప్రపంచంలోకి ప్రవేశపెట్టిన సర్వస్వం అంతరించాడు.

అందరికంటే యెక్కువగా సర్వస్వం వొక సత్యాన్ని గుర్తించాడు. తెలుగులో ఆధునికత సహజంగా వచ్చిందికాదు. అది దిగుమతి చేసుకున్న ఆధునికత, దళారీ ఆధునికత. సొంత ఆధునికత దానికిలేదు తెలుగుభాష పరాధీనం. అందువల్ల సొంతభావాలూ సొంతరచనలూ అనే మిథ్యాభావాన్ని విడిచిపెట్టాలి. యీ వాస్తవం చాలామంది మేధావులకి తెలుసుకాని, సర్వస్వంలో జీర్ణమైనంతగా యెవరిలోనూ జీర్ణంకాలేదు. అందుకే అతడు బతికివున్నంత వరకు వొకసొంత ఆలోచన చేయలేదు. సొంతమాట మాట్లాడలేదు.

సొంతాస్తిని విడిచిపెట్టడం కన్న సొంతాలోచనని త్యజించడం చాలా కష్టం. అందుకు చాలా జ్ఞానం కావాలి. దానిని సర్వస్వం సాధించాడు. సర్వస్వం యికలేడు అన్నమాట తెలుగునాట కాన్వెంటు స్కూళ్లు అన్నీ మూతపడ్డాయి అన్నంతగా భయపెట్టింది మేధావి వర్గాన్ని.

యెందుకంటే సర్వస్వం వల్ల యెందరో రచయితలు లాభపడ్డారు అవార్డులు పొందారు. అతడేది చెప్పినా యింగ్లీషు వుటంకింపుల్తో చెప్తాడు. అందువల్ల వారి రచనలకి కూడా తెలుగు మీరిపోయాయన్న గౌరవం దక్కేది.