తెలుగునేల నుంచి కొన్ని వందల ఏండ్ల క్రితం వలస వెళ్ళి అక్కడి అడువులను కొట్టి, నేలను తీర్చి, సాగులోనికి తెచ్చిన తెలుగువారి కథే గోపల్లె. తరువాత ఆ గ్రామం పెరిగి పెద్దదై ఎంతో మంది తెలుగు ప్రజలను తనలో కలుపుకొని స్వాతంత్రోద్యమ కాలాన ఎట్లా నడిచిందో చెప్పిన కథే రెండో నవలగా వచ్చిన గోపల్లె పురత్తుమక్కళ్ (గోపల్లె పురజనులు). దీనికి కేంద్రసాహిత్య అకాడమీ పురస్కారం లభించింది. ఈ గ్రంథంతో తమిళ సాహిత్యంలో ఓ కొత్త ఒరవడి ఏర్పడింది.

ఈ గ్రంథకర్త 'కీరా' గా ప్రసిద్ధి చెందిన శ్రీకృష్ణ రాజనారాయణ పెరుమాళ్ రామానుజం నాయకర్ (1923) తమిళ సాహిత్యంలో ఒక కొత్త ఒరవడిని సృష్టించిన ప్రఖ్యాత రచయిత, బహుగ్రంథ కర్త. తమిళనాడులో దక్షిణాంధ్ర సాంఘిక జీవనాన్ని అందరికీ తెలిపిన 'సాహిత్య చింతామణి.'

ఈ గ్రంథం దక్షిణాంధ్రుల సాంఘిక జీవితానికి, సంప్రదాయానికి అద్దం పడుతుంది. ఈ గ్రంథమూలం తమిళమైనా, దానిని మనం దక్షిణాంధ్ర సాహిత్యంగా పరిగణించవచ్చు.ఈ గ్రంథాన్ని తెలుగు మాండలికంలోకి ఎంతో శ్రమించి అనువాదించిన కృష్ణగిరి రచయితల సంఘం సభ్యులు నంద్యాల నారాయణరెడ్డి గారు దక్షిణాంధ్ర నుడికారాన్ని బ్రతికిస్తున్న సాహితీవేత్త.