కొన్ని కొన్నిసార్లు

నువ్వలా నడిచి వస్తుంటావు నాలోకి

ఒక గాలి తెమ్మరలానో

పల్చటి నీరెండలానో

ముందస్తు కబురు లేకుండా

కురిసే వాన లానూ

అనుకోకుండా వచ్చిన ఉత్తరంలానో

కూతపెట్టుకుంటూ రైలుబండి

స్టేషనులోకి వచ్చినట్టు

చీకటి తెరలు తొలగించుకొని

పొద్దు పొడిచినట్టు

తలపులు తగదునమ్మా అని తయారయిపోతాయి

నీకు ఆహ్వానం పలుకడానికి

నీలిమేఘమై నీలాలనింగిలో తేలుతూ వచ్చి

కొన్ని తేనెచినుకులు చిలకరించి వెళ్ళిపోతావు