నువ్వు పరశురాముడివై తలనరికినాడు
తండ్రికి తగ్గ తనయుడవని తలొంచాను
రాముడిగా నువ్వు
నిండు చూలాలిగా ఉన్న నన్ను
అరణ్యాల పాలు చేసినప్పుడు
రాజుగా ప్రవర్తించావని మెచ్చుకున్నాను
హరిశ్చంద్రుడిలా యిచ్చిన మాట కోసం
ఆలినే అమ్ముకున్నప్పుడు
సత్యసంధుడవని సంబరపడ్డాను
ధర్మరాజుగా జూదంలో ఫణంగా పెట్టి ఓడినప్పుడు
కష్టాల్లో పాలుపంచుకున్నానని ఆనందించాను.
కృష్ణుడిగా పదహారువేలమంది భార్యల్ని భరించిననాడు
భర్తవి కదా అని సరిపెట్టుకున్నాను
అన్ని కాలాల్లోను
నిన్ను నేను నమ్ముకుని వరించానే కానీ యెదిరించలేదు
ఇప్పుడు మాత్రం
అమ్మకాని కున్న నిన్ను వెలకట్టి కొనుక్కోలేను
ఇక నిన్నెవ్వరూ కొనుక్కోకుండా చూడడమే నా పని!